Accident : घोडसगावजवळ ट्रक व टँकर्सचा भयंकर अपघात, पाच जण जागीच ठार !
मुक्ताईनगर, मंडे टू मंडे न्यूज प्रतिनिधी : राष्ट्रीय महामार्गावर घोडसगाव जवळ बंद पडलेल्या टँकरमधून दुसर्‍या टँकरमध्ये दुध टाकत असतांना भरधाव वेगाने आलेल्या टाईल्सने भरलेल्या ट्रकने टँकर्स व क्रेनला जोरदार धडक दिल्याने झालेल्या भीषण अपघातात ५ जणांचा जागीच मृत्यू झाल्याची भयंकर घटना घडली असून मयतामध्ये चार जण धुळे जिल्ह्यातील तर एक जळगाव जिल्ह्यातील आहे.
काल रात्री धुळ्याहून दूध घेऊन चाललेला टँकर राष्ट्रीय महामार्गावर घोडसगावपासून दोन किलोमीटर अंतरावर अचानक बंद पडल्याने टँकरच्या मालकाने धुळ्यावरून दुसरा टँकर बोलावून यात दूध शिफ्ट करण्याचे काम सुरू केले. यासाठी एक क्रेन देखील बोलावण्यात आली. यानुसार दुध हलविण्याचे काम सुरू असतांना समोरून भरधाव वेगाने आलेल्या टाईल्सने भरलेल्या ट्रकने दोन्ही टँकर्स आणि क्रेनला भीषण धडक दिली. या भीषण अपघातात बंद पडलेल्या टँकरमधील तीन जण, टँकरचा मालक आणि अजून एक जण अशा पाच जणांचा जागीच मृत्यू झाला आहे. अपघात एवढा भीषण होता की यात ट्रक चा अक्षरशः चुराळा झाला आहे.
पोलिसांकडून मिळालेल्या माहितीनुसार, पवन सुधाम चौधरी (वय-२५ रा. धुळे), धनराज बन्सीलाल पाटील (वय-४१ रा. नगाव, जि. धुळे), धनराज सुरेश सोनार (वय- ३७ रा. शिवाजीनगर, जळगाव), उमेश राजेंद्र सोळंके (वय-३५ रा.देवपूर जि. धुळे), भालचंद्र गुलाब पाटील (वय- ३१ रा. भिलाडी जि. धुळे) अशी मयत झालेल्या पाच व्यक्तींची नावे आहेत.
मृत्यूमुखी पडलेल्यांचे मृतदेह हे मुक्ताईनगरच्या उपजिल्हा रूग्णालयात पाठविण्यात आले आहेत. पहाटे तीन वाजेच्या सुमारास हा अपघात झाला दरम्यान, ट्रकने धडक दिल्यानंतर ट्रकच्या चालकाने घटनास्थळावरून पळ काढला. मात्र पोलिसांनी त्याचा पाठलाग करून पुढील एका ढाब्यावरून त्याला ताब्यात घेत त्याचा जबाब घेऊन गुन्हा नोंदविण्याची प्रक्रिया सुरू मुक्ताईनगर पोलिसात सुरू आहे.
