यावल येथे लोखंडी तावा डोक्यात मारल्याने एक गंभीर
यावल, मंडे टू मंडे न्युज नेटवर्क l यावल शहरातील बोरावल गेट परिसरात ग्राहक व विक्रेत्यामध्ये मोठा वादविवाद झाल्याने वादविवादाचे रूपांतर हाणामारीत झाले त्यात विक्रेत्याने ग्राहकाच्या डोक्यावर लोखंडी दांड्याचा तावा मारल्याने ग्राहक गंभीर जखमी झाल्याची घटना घडली.
या बाबत मिळालेल्या माहितीनुसार, यावल येथील बोरावल गेट परिसरात पराग जगदीश चौधरी यांचे पराग आमलेट सेंटर असून त्या अंडा आम्लेट सेंटर वर यावल तालुक्यातीलच पिंप्री येथील सुधाकर ज्ञानेश्वर सपकाळे हा २६ वर्षीय युवक काल सायंकाळच्या सुमारास अंडा भुर्जी घेण्यासाठी आला असता भुर्जी घेण्यावरून ग्राहक सुधाकर सपकाळे व विक्रेता पराग जगदीश चौधरी यांचेत वादविवाद झाला. त्या वादविवादाचे रूपांतर हाणामारीत होऊन विक्रेता पराग चौधरी याने लोखंडी दांड्याचा तावा सुधाकर याचे डोक्यात मारला त्यात सुधाकर सपकाळे हा गंभीर जखमी झाला. त्यास तातडीने येथील यावल ग्रामीण रुग्णालयात आणले असता जख्मीची प्रकृती गंभीर असल्याने त्यास प्राथमिक उपचार करून पुढील उपचारासाठी सामान्य रुग्णालय जळगाव येथे हलविण्यात आले आहे.जखमी सुधाकर सपकाळे याचे काका शरद जनार्दन सपकाळे यांच्या फिर्यादी वरून यावल पोलिस स्टेशनला विक्रेता पराग चौधरी यांचे विरुद्ध गुन्हा दाखल करण्यात आला आहे.
