न्हावी गावात पंढरपूरच्या चंद्रभागेत बुडालेल्या तरुणावर शोकाकुल वातावरणात अंत्यसंस्कार
फैजपूर, मंडे टु मंडे न्युज नेटवर्क | यावल तालुक्यातील न्हावी येथील तीन व इतर ठिकाणचे दोन अशा पाच मित्रांसह औरंगाबादहून पंढरपूर येथे दर्शनासाठी गेलेल्या मित्रांमधील न्हावी येथील दर्पण निलेश कोलते वय १८ वर्ष. याचा चंद्रभागेत बुडून दुर्दैवी मृत्यू झाला तर दुसरा सुदैवाने बचावला उर्वरित मित्र नदी काठावर होते आज सकाळी नऊ वाजेचे दरम्यान मयत तरुणावर न्हावी येथील स्मशानभूमीत अंत्यसंस्कार करण्यात आले.
न्हावी येथील मोलमजुरी करणाऱ्या कोलते परिवारातील दर्पण निलेश कोलते वय १८ वर्ष. व त्याचे मित्र मनोज रघुनाथ कापडे, दिगंबर निलेश पवार आणि चाळीसगाव व परडी येथील दोन तरुण असे पाच मित्र औरंगाबाद येथे गव्हर्नमेंट पॉलीटेक्निकल कॉलेजला दुसऱ्या वर्षात शिक्षण घेत होते. दिगंबर पवार हा रावेर येथे आयटीआय ला आहे. तीन दिवसाची सुट्टी असल्याने पाचही मित्रांनी विठुरायाचे दर्शन घेण्याचा बेत केला आणि ते पंढरपूरला रवाना झाले.
पंढरपूरला मनोज कापडे, दिगंबर पवार आणि मयत दर्पण कोलते हे चंद्रभागेच्या पात्रात भक्त पुंडलिकाच्या मंदिराजवळ अंघोळीसाठी गेले असता यातील मनोज आणि दर्पण हे दोघं उतरले त्यात नदीपात्रात पाण्याचा अंदाज न आल्याने तिथे दर्पणचा पाय घसरला आणि तो पाण्यात बुडाला तर दुसरा मनोज पाण्यात बुडत असताना त्याला दिगंबर पवार हा नदीकाठी बसलेला असल्याने त्याने आरडाओरड केली व भाविकांना जमा केले तत्काळ भाविकांनी मनोजला बुडता बुडता वाचविले तर दर्पण हा बुडाला असल्याने आठ तासानंतर त्याचा मृतदेह बाहेर काढण्यात आला.
दर्पणचा मृतदेह आज सोमवारी सकाळी आठ वाजता न्हावी गावात आणण्यात आला. दर्पण कोलते यांचेवर न्हावी गावातील स्मशानभूमीत शोकाकुल वातावरणात अंत्यसंस्कार करण्यात आले. दर्पण कोलते हा गरीब कुटुंबातील विद्यार्थी होता आई वडील मजुरी करतात व दोघ मुलांचे शिक्षण करीत होते लहान भावाने इयत्ता दहावीची परीक्षा नुकतीच दिलेली आहे तर मोठा भाऊ औरंगाबाद येथे पॉलीटेक्निक कॉलेजला शिक्षण घेत होता. अशा या कठीण परिस्थितीत या तरुणाचा मृत्यू झाल्याने गावात शोक कळा पसरली आहे.
