वनरक्षक जळगाव एसीबी च्या जाळ्यात, लाच प्रकरणी गुन्हा दाखल, वनविभागात खळबळ
फैजपूर, ता. यावल. मंडे टु मंडे न्युज नेटवर्क | लाकूड वाहतुकीवर कारवाई न करण्यासाठी १० हजार रुपयांची लाच मागणाऱ्या वन विभागातील वनरक्षकावर लाचलुचपत प्रतिबंधक विभागाने (एसीबी) कारवाई केली . या प्रकरणी भैय्यासाहेब भीमराव गायकवाड (वय ४३), व्यवसाय – वनरक्षक (आगार रक्षक चालक), नेमणूक -वनपरिक्षेत्र अधिकारी कार्यालय, यावल (जि. जळगाव) यांच्याविरुद्ध भ्रष्टाचार प्रतिबंधक अधिनियम १९८८ च्या कलम ७ अन्वये गुन्हा दाखल करण्यात आला आहे.
अधिक माहिती अशी की, तक्रारदार हे यावल परिसरातील असून ते दोन बोलेरो पिकअप वाहनांद्वारे अंजळे, पाडळसे व आजूबाजूच्या भागात लाकूड वाहतुकीचा व्यवसाय करतात. तक्रारदारांच्या वाहनांद्वारे लाकूड वाहतूक सुरू ठेवण्यासाठी व कोणतीही कारवाई न करण्याच्या बदल्यात वनरक्षक भैय्यासाहेब गायकवाड यांनी तक्रारदारांकडे १०,००० रुपयांची लाच मागितल्याचा आरोप आहे.
या मागणीबाबत तक्रारदारांनी दि. २० मार्च २०२६ रोजी लाचलुचपत प्रतिबंधक विभाग, जळगाव येथे तक्रार नोंदवली. तक्रारीची पडताळणी केल्यानंतर एसीबीने त्याच दिवशी सापळा कारवाई आयोजित केली. त्यावेळी आरोपी गायकवाड यांनी लाच मागितल्याचे निष्पन्न झाले आणि तडजोडीअंती ९,००० रुपये स्वीकारण्याची तयारी दर्शविली. तथापि, तक्रारदारांकडून पैसे घेण्यासाठी ते आले असता त्यांना संशय आल्याने त्यांनी लाच रक्कम प्रत्यक्ष स्वीकारली नाही. तरीदेखील लाच मागणीचा पुरावा मिळाल्यामुळे
भैय्यासाहेब भिमराव गायकवाड, वय-४३ वर्ष, व्यवसाय वनरक्षक, (आगार रक्षक यावल), नेम-वनपरिक्षेत्र, अधि. कार्यालय, यावल पुर्व, ह.रा. फॉरेस्ट क्वॉर्टर, यावल.
त्यांच्या विरुद्ध फैजपूर पोलीस स्टेशन (जि. जळगाव) येथे गुन्हा नोंद करण्यात आला आहे.
कारवाईदरम्यान आरोपीच्या अंगझडतीत ९,०४० रुपये रोख रक्कम तसेच दोन मोबाईल फोन जप्त करण्यात आले. त्यामध्ये एक सॅमसंग कंपनीचा मोबाईल (अंदाजे किंमत २५ हजार रुपये) व एक आयटेल कंपनीचा मोबाईल (अंदाजे किंमत १ हजार रुपये) यांचा समावेश आहे. मोबाईल हँडसेटची पुढील तपासणी करण्यात येणार असल्याची माहिती अधिकाऱ्यांनी दिली
सदरची कारवाई पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक रेशमा अवतारे यांच्या नेतृत्वाखालील पथकाने केली. या पथकात पोलिस कर्मचारी बाळू मराठे, राकेश दुसाने, सुरेश पाटील आदींचा समावेश होता. पुढील तपास पोलीस निरीक्षक हेमंत नागरे करीत आहेत. या कारवाईमुळे वन विभागात मोठी खळबळ उडाली आहे.
