जळगावच्या तरुणांकडून नागपुरच्या तरुणीला लग्नाचे आमिष दाखवून अत्याचार
मंडे टू मंडे वृत्तसंकलन।
जळगाव,मंडे टू मंडे न्युज वृत्तसेवा। जळगाव शहरातील गेंदालाल मिल परिसरातील तरुणाने लग्नाचे आमिष दाखवित नागपुरातील तरुणीवर तब्बल सात महिने शारीरिक अत्याचार केल्याची घटना समोर आली आहे.
पीडित तरुणी ही नागपूर जिल्ह्यातील एका गावातील रहिवासी असून २०२१ मध्ये दिवाळीमध्ये तिची इन्स्टाग्रामवर जळगावातील गेंदालाल मिल येथील दानिश मुलतानी याच्याशी ओळख झाली. पुढे या ओळखीचे रुपांतर प्रेमात होवून दोघांचे मोबाईलवर बोलणे सुरु झाले. यादरम्यान तरुणीचे तिच्या समाजातील तरुणासोबत लग्न ठरले. यादरम्यान दानिश याने तरुणीला फोन करुन मी तुझ्यावर प्रेम करतो, मी तुझ्याशी लग्न करेन असे सांगितले. तसेच लग्नाचे आमिष दाखवित दानिश याने वेळावेळी नागपूरातील लॉज, तसेच जळगावात तरुणीवर शारीरिक अत्याचार केले. ४ एप्रिल रोजी तरुणी जळगावात आली. दानिशच्या कुटुंबीयांना भेटली. ७ एप्रिलपर्यंत ती जळगावात राहिली. त्यानंतर दानिशच्या मित्रांनी तिला मलकापूर येथे सोडले. तरुणी कशीबशी नागपुरातील तिच्या मावशीकडे पोहोचली. यादरम्यान तरुणीने दानिशला फोन केले. आपल्याला घ्यायला येण्याची तिने त्याला विनंती केली. मात्र त्यान
येण्यास नकार दिला आणि तरुणीला जळगाव येण्यास सांगितले.
पीडित तरुणी एकटीच जळगावात आली. यादरम्यान दानिशने त्याचा फोन बंद करुन ठेवला. फोन लागत नसल्याने तरुणी जळगावात नुतन मराठा महाविद्यालयाजवळ पोहचली. दानिशसोबत संपर्क होत नसल्याने तरुणी हताश झाली व याच ठिकाणी रडत बसली. त्यावेळी काही तरुणांचे तिच्याकडे लक्ष गेले. तरुणांना पीडित तरुणीने आपबिती कथन केली. त्यानंतर तरुणांनी तिला एका समाजसेविकेकडे नेले. समाजसेविकेच्या मदतीने या तरुणी तक्रारी दाखल करण्यासाठी शहर पोलीस ठाण्यात पोहचली. तरुणीच्या तक्रारीनुसार शहर पोलिसात सोमवारी रात्री गुन्हा दाखल करण्यात आला. गुन्हा दाखल होऊन काही तासातच तपास अधिकारी सहाय्यक पोलीस निरिक्षक संदीप परदेशी यांच्या मार्गदर्शनाखाली गुन्हे शोध पथकाने संशयित दानिश मुलतानी रा. गेंदालाल मिल ,जळगाव,यास गेंदालाल मिलमधून अटक केली. या प्रकरणी पुढील तपास सुरु आहे.
