शिवलिंग घेण्यासाठी निघालेल्या भाविकांवर काळाची झडप, ट्रकने क्रुझरला दिलेल्या धडकेत तीन ठार,चार जखमी
जळगाव,मंडे टु मंडे न्युज नेटवर्कl भरधाव डंपरने क्रूझरला दिलेल्या धडकेत तीन ठार झाले असून चार जण जखमी झाले आहेत. शिवलींग घेण्यासाठी ओंकारेश्वर येथे निघालेल्या भाविकांवर काळाने क्रूर झडप घातली,आज सकाळी हा अपघात महामार्गावर जळगाव जवळील बांभोरी जवळ घडला.
प्राणप्रतिष्ठाकरिता शिवलिंग घेण्यासाठी मध्य प्रदेशातील ओंकारेश्वर जवळ बकावा येथे जाणाऱ्या भाविकांच्या क्रूझर कारला वाळूच्या भरधावं ट्रकने धडक दिल्याने तीन जणांचा जागीच मृत्यू झाल्याची भीषण घटना शुक्रवारी दि. १५ मार्च रोजी सकाळी ७ वाजता घडली. जळगावातून घरापासून निघून अवघ्या ३ किमी अंतरावर असलेल्या बांभोरीजवळ हा अपघात झाला आहे.
विजय हिम्मत चौधरी (वय् ४०, साई नगर), तुषार वासुदेव जाधव (वय् २८, रा. खोटे नगर) व भूषण सुभाष खंबायत (३५, रा.साई नगर ) यांचा मृत झालेल्यांत समावेश आहे. तर चार जण गंभीर जखमी झाले आहे. त्यांच्यावर खाजगी रुग्णालयात उपचार सुरू आहेत. साईनगर भागात शिव मंदिर बांधण्यात आले असून, या मंदिरातील शिवलिंग घेण्यासाठी शुक्रवारी दि. १५ मार्च रोजी सकाळी साडे सहा वाजता क्रुझर गाडीने ओंकारेश्वरला निघाले होते. मात्र घरापासून अवघ्या पाच मिनिटांचा अंतरावरच बांभोरी गावाजवळ समोरून येणाऱ्या ट्रकने क्रुझरला जोरदार धडक दिली.या भीषण अपघातात तीन जणांचा जागीच मृत्यू झाला. तर दिलीप साळुंखे, के. डी. पाटील, अनिल ठाकरे, बापू पाटील हे चार जण गंभीर जखमी झाले आहेत. त्यांच्यावर जळगाव शहरातील खाजगी रुग्णालयात उपचार सुरू आहेत.
अशी आहे मयतांची कौटुंबिक माहिती या घटनेत मयत झालेला भूषण खंबायत याचे साईनगर येथे समृद्धी प्रोव्हिजन आहे. त्याच्या पश्चात आई-वडील, भाऊ, बहीण, पत्नी, एक मुलगी असा परिवार आहे. तर विजय चौधरी हे शेरी ता. धरणगाव येथे जिल्हा परिषदेच्या शाळेत माध्यमिक शिक्षक असून त्यांच्या पश्चात आई वडील, एक मुलगा, एक मुलगी, पत्नी असा परिवार आहे. तुषार जाधव हा ड्रायव्हर असून मागच्या वर्षी त्याचे लग्न झाले होते. त्यांच्यावर घराची जबाबदारी होती. कुटुंबाचा उदरनिर्वाह करत होता. त्याच्या पश्चात आई-वडील, भाऊ, पत्नी असा परिवार आहे. दरम्यान मयत झालेल्या सर्वांच्या कुटुंबीयांनी रुग्णालयात एकाच आक्रोश केला होता.
पाळधी पोलीस स्टेशनला घटनेची माहिती मिळताच त्यांनी घटनास्थळी धाव घेतली. जखमींना रुग्णालयात दाखल करण्यासाठी ग्रामस्थांच्या मदतीने प्रयत्न सुरू केले होते. त्यानंतर पोलीस स्टेशनला घटनेची नोंद करण्याचे काम सुरू आहे.
