पेट्रोल टंचाईच्या अफवेमुळे जळगाव व ग्रामीण भागात पेट्रोल पंपांवर वाहनांच्या लांबच लांब रांगा
नशिराबाद, मंडे टु मंडे न्युज. डॉ. दीपक लोखंडे | आखाती देशात वाढलेल्या तणावपूर्ण घडामोडींच्या व हालचालींच्या पार्श्वभूमीवर, विशेषतः इराण,इस्रायल आणि अमेरिका यांच्यातील तणावामुळे इंधन टंचाई निर्माण होणार असल्याच्या अफवांनी जळगाव व ग्रामीण परिसरात नागरिकांमध्ये चिंतेचे व भीतीचे वातावरण निर्माण झाले आहे. या अफवांचा थेट परिणाम स्थानिक पातळीवर दिसून येत असून, पेट्रोल व डिझेल भरण्यासाठी विविध पंपांवर वाहनांच्या लांबच लांब रांगा लागल्या.
जळगाव जिल्हाधिकारी यांचे आवाहन:
सायंकाळच्या सुमारासच एका पेट्रोल पंप वरील पेट्रोल संपल्याने ही अफवा पसरल्याचे समजते. यामुळे नागरिकांनी मोठ्या प्रमाणावर पेट्रोल पंपांकडे धाव घेऊन गर्दी केलेली दिसली . रात्री उशिरापर्यंत ही गर्दी कायम राहिल्याने अनेक ठिकाणी गोंधळाची परिस्थिती निर्माण झाली. काही नागरिकांनी संभाव्य तुटवड्याच्या भीतीपोटी आवश्यकतेपेक्षा जास्त इंधन साठवण्याचा प्रयत्न केल्याचेही निदर्शनास आले.अचानक वाढलेल्या ग्राहकसंख्येमुळे पेट्रोल पंपावरील कर्मचाऱ्यांवर ताण निर्माण झाला. काही भागांत वाहतुकीची कोंडी झाली असून, स्थानिक प्रशासनाला परिस्थिती नियंत्रणात ठेवण्यासाठी प्रयत्न करावे लागले.
दरम्यान, जिल्हाधिकारी यांनी प्रसारमाध्यमांद्वारे स्पष्ट केले आहे की, सध्या कोणतीही अधिकृत इंधन टंचाई जाहीर करण्यात आलेली नाही. मध्यपूर्वेतील तणावाचा परिणाम आंतरराष्ट्रीय तेलबाजारावर होऊ शकतो, मात्र तात्काळ स्थानिक पुरवठ्यावर परिणाम झाल्याची कोणतीही पुष्टी किंवा दुजोरा दिलेला नाही. त्यामुळे नागरिकांनी कोणताही आधार नसलेल्या माहितींवर विश्वास न ठेवता संयम राखावा, असे आवाहन प्रशासनाकडून करण्यात आले आहे.तज्ज्ञांच्या मते, अशा आंतरराष्ट्रीय तणावाच्या काळात अफवा वेगाने पसरतात आणि त्यामुळे कृत्रिम तुटवडा निर्माण होण्याची शक्यता असते. त्यामुळे नागरिकांनी घाबरून न जाता आवश्यक तेवढेच इंधन खरेदी करणे गरजेचे आहे.
