नगरपालिका निवडणुक : जळगाव जिल्ह्यात २ डिसेंबर “या” मतदानाच्या दिवशी कामगारांना भरपगारी सुट्टी
.जळगाव, मंडे टु मंडे न्युज नेटवर्क | जळगाव जिल्ह्यात २ डिसेंबर २०२५ रोजी जिल्ह्यातील जामनेर, अमळनेर, भुसावळ, भडगाव, चाळीसगाव, चोपडा, धरणगाव, एरंडोल, सावदा, फैजपूर, रावेर, यावल, मुक्ताईनगर, वरणगाव, नशिराबाद, पाचोरा, पारोळा, शेंदुर्णी, आदी नगरपरिषदा व नगरपंचायतीच्या सार्वत्रिक निवडणूक असून लोकप्रतिनिधित्व कायदा १९५१ च्या कलम १२५(बी) अन्वये मतदानाच्या दिवशी कामगारांना भरपगारी सुट्टी देणे बंधनकारक आहे.
गेल्या निवडणुकांत काही आस्थापनांनी सुट्टी न दिल्याच्या तक्रारी प्रशासनाकडे आल्या होत्या. त्यामुळे यंदा विशेष खबरदारी घेत, उद्योग, ऊर्जा व कामगार विभागांतर्गत येणाऱ्या सर्व आस्थापना, दुकाने, कारखाने, हॉटेल्स, मॉल्स, आयटी कंपन्या, व्यापारी प्रतिष्ठाने आदींना हे आदेश लागू राहतील, असे स्पष्ट करण्यात आले आहे.
अपवाद अत्यावश्यक व अविरत सेवांमध्ये सुट्टी देणे शक्य नसल्यास कर्मचारी व कामगारांना २ ते ३ तासांची विशेष सवलत देऊन मतदानाचा हक्क बजावता येईल, याची संबंधितांनी काळजी घ्यावी, असे प्रशासनाने निर्देश दिले आहेत. मतदानासाठी सुट्टी किंवा सवलत न दिल्यास आणि त्यामुळे मतदार वंचित राहिल्यास संबंधित आस्थापनांवर कारवाई करण्यात येणार असे सहाय्यक कामगार आयुक्त यांच्या वतीने प्रसिद्धी पत्रकाद्वारे कळविण्यात आले आहे.
