Murder : तरुणाची धारदार शस्त्राने हत्या, हत्याकांडाने खळबळ
नाशिक, मंडे टू मंडे न्युज प्रतिनिधी : जिल्ह्यात पुन्हा एकदा भीषण हत्याकांड घडलं आहे. तरुणाच्या पोटात धारदार शस्त्राने वार करुन २४ वर्षीय तरुणाची निर्घृण हत्या करण्यात आली आहे. नाशिकमधील म्हसरूळ परिसरात ही घटना घडली आहे. या घटनेमुळे एकच खळबळ उडाली आहे.
मिळालेल्या माहितीनुसार, म्हसरूळ परिसरातील आकाश पेट्रोल पंपाजवळील सावरकरनगर गार्डनजवळ काल रात्री दोन गटांमध्ये वाद सुरू होता. दोेन्ही गट एकमेकांविरुद्ध उभे ठाकले होते. यादरम्यान एकाने यश रामचंद्र गांगुर्डे (वय २४, रा. म्हसरूळ) याला तेथे बोलावले. त्यानंतर यश गांगुर्डेने तेथे येऊन दोन्ही गटांत सुरू असलेला वाद मिटविण्याचा प्रयत्न केला. दरम्यान, तेथे असलेल्या चार जणांपैकी एकाने यश गांगुर्डे हा वाद सोडवीत असताना त्याच्या पोटात चॉपरने वार केला. यामध्ये यश हा रक्‍तबंबाळ झाला.
यावेळी त्याच्याबरोबर असलेला एक जण हत्येचा प्रकार घडताच पळून गेला. जखमी अवस्थेत असलेल्या यशला रुग्णालयात औषधोपचारासाठी नेले असता अतिरक्तस्त्राव झाल्याने डॉक्टरांनी त्याला तपासून मयत घोषित केले. याप्रकरणी म्हसरूळ पोलीस ठाण्यात अज्ञात हल्‍लेखोरांविरुद्ध फिर्याद दिली आहे. या प्रकरणातील संशयितांची नावे निष्पन्न झाली असून त्यांचा शोध सुरू असल्याचे सूत्रांनी सांगितले.
काही दिवसांपूर्वी नाशिक जिल्ह्यात वेगवेगळ्या घटनांमध्ये विहिरीत चार मृतदेह आढळून आले होते. नाशिक जिल्ह्यात तीन वेगवेगळ्या ठिकाणी घडलेल्या घटनेत विहिरीत चार जणांचे मृतदेह आढळून आले आहेत. या घटनेने नाशिक जिल्ह्यात एकच खळबळ उडाली आहे.
