बिग ब्रेकिंग : नगरपालिका निवडणुका जाहीर, १८ ऑगस्टला मतदान, वाचा सविस्तर
मुंबई, मंडे टू मंडे न्युज वृत्तसेवा : राज्यात पुन्हा लवकरच निवडणुकींचा धुरळा उडताना बघायला पाहायला मिळणार आहे. कारण आजच 92 नगरपरिषदा आणि चार नगरपंचायतींसाठी निवडणूक जाहीर झाली आहे. पाऊस कमी राहिल्यास 18 ऑगस्टला या नगरपरिषदा आणि नगरपंचायतींसाठी मतदान होणार आहे. तसेच लगेच दुसऱ्याच दिवशी म्हणजे 19 ऑगस्टला निकालही लागणार आहे. निवडणूक आयोगाने आजच हा कार्यक्रम जाहीर केल्यामुळे आता पुन्हा अनेक नगरपरिषदेतली रस्सीखेच पाहायला मिळणार आहेत.
महाराष्ट्राच्या 17 जिल्ह्यांतील 92 नगरपरिषद आणि 4 नगरपंचायतीच्या सार्वत्रिक निवडणूकांचे बिगूल वाजले आहे. नगरपरिषदा आणि नगरपंचायतीच्या निवडणुका जाहीर करण्यात आल्या आहेत. येत्या 18 ऑगस्ट रोजी मतदान होणार आहे. तसेच, 19 ऑगस्टला मतमोजणी होणार आहे. या निवडणूकीच्या प्रक्रियेला 20 जुलैपासून सुरुवात होणार आहे. तर स्थानिक राजकारणात अनेक ठिकाणी नवी समीकरणंही पाहायला मिळणार आहेत. अनेक ठिकाणी नव्या युती, नव्या आघाडी पाहायला मिळणार आहेत. स्थानिक लेव्हलच्या निवडणुकांचे गणित हे नेहमीच वेगळं राहिलं आहे.
असा असेल निवडणूक कार्यक्रम–
अंतिम प्रभाग निहाय मतदार याद्या अधिप्रमाणे करून 5 जुलैला प्रसिद्ध करण्यात आले आहेत.
जिल्हाधिकाऱ्यांनी निवडणूक कार्यक्रम जारी करण्याची तारीख ही 20 जुलै अशी ठरविण्यात आली आहे.
तर नामनिर्देशन पत्र राज्य निवडणूक आयोगाने निश्चित केलेल्या वेबसाईटवर भरण्याकरता उपलब्ध असण्याचा कालावधी 22 जुलै ते 28 जुलै असणार आहे, म्हणजेच या तारखेत उमेदवारांना आपले उमेदवारी अर्ज दाखल करता येणार आहे.
यात रविवार असल्यास उमेदवारी अर्ज स्वीकारला जाणार नाही त्यामुळे उमेदवारांनी तीही काळजी घेणं अत्यंत गरजेचं आहे.
अर्जांची छाननी झालेल्या उमेदवारांची यादी ही 29 जुलैला सकाळी अकरा वाजल्यापासून प्रसिद्ध करण्यात येणार आहे.
तसेच अर्ज मागे घेण्याची अंतिम तारीख ही 4 ऑगस्ट दुपारी तीन वाजेपर्यंत अशी दिली आहे.
अर्जावर काही आक्षेप अथवा अपील असल्यास आठ तारखेपर्यंत म्हणजेच 8 ऑगस्टपर्यंत तुम्हाला त्याबाबत निवडणूक अधिकाऱ्यांशी संपर्क साधता येणार आहे.
तसेच निवडणूक चिन्ह नेमून देण्याचा तसेच अंतिमरीत्या निवडणूक लढवणाऱ्या उमेदवारांची यादी प्रसिद्ध करण्याची तारीख ही उमेदवारी अर्ज मागे घेण्यासाठीच्या शेवटच्या दिवसानंतर दुसऱ्याच दिवशी करण्यात येणार आहे.
18 ऑगस्ट रोजी सकाळी साडेसात वाजल्यापासून ते संध्याकाळी साडेपाच वाजेपर्यंत मतदान घेण्यात येईल.
तसेच मतमोजणी आणि निकाल जाहीर करण्याची तारीख ही 19 ऑगस्ट शुक्रवार अशी देण्यात आलेले आहे. सकाळी दहा वाजल्यापासून हे निकाल जाहीर व्हायला सुरुवात होणार आहे, असा एकूणच हा निवडणूक कार्यक्रम असणार आहे.
