मधुमेह, हृदयरोग, गंभीर स्वरूपाचा संसर्ग सह ९०० औषधांच्या किंमतीत वाढ
नवी दिल्ली, मंडे टु मंडे न्युज नेटवर्क | सर्वसामान्य नागरिकांसाठी चिंतेची बातमी समोर आली आहे. एप्रिल महिन्यापासून ९०० हून अधिक अत्यावश्यक औषधांच्या किंमती १.७४ टक्क्यांनी वाढल्या आहेत. यामुळे सामान्य लोकांच्या औषधांवरील खर्चात वाढ होणार आहे.
नॅशनल फार्मास्युटिकल प्राइसिंग ऑथॉरिटीने (एनपीपीए) हा निर्णय घेतला आहे. यात गंभीर स्वरूपाचा संसर्ग, हृदयरोग, मधुमेह आदी विकारांवरील औषधांचा समावेश आहे. अझिथ्रोमायसीन, आयब्रुफेन आदी औषधांच्या किमती वाढल्या आहेत.
औषधे (किंमत नियंत्रण) आदेश, २०१३ मधील तरतुदींनुसार अनुसूचित औषधांच्या कमाल किमतींचे वार्षिक पुनर्निर्धारण घाऊक किंमत निर्देशांकाच्या आधारे केले जाते. त्यानुसार वर्ष २०२४-२५ साठी अनुसूचित औषधांच्या कमाल किमती, घाऊक किंमत निर्देशांकातील वार्षिक बदलाच्या आधारे दि. १ एप्रिल, २०२४ पासून ०.००५५१ टक्क्याने वाढविण्यात आल्या होत्या. एनपीपीए नवीन औषधांच्या किरकोळ विक्रीच्या किमतीदेखील ठरवते असे केंद्रीय रसायने व खत या खात्याच्या मंत्री अनुप्रिया पटेल यांनी लोकसभेत नुकतेच सांगितले.
एनएनपीएने म्हटले आहे की, २०२४मध्ये घाऊक मूल्य निर्देशांकामध्ये १.७४०२८ टक्के इतका बदल आहे. केंद्रीय रसायने, खते खात्याच्या अख्यत्यारीत असलेली एनपीपीए ही संघटना दरवर्षी आवश्यक औषधांचे घाऊक मूल्य निर्देशांकाच्या आधारे पुनरावलोकन करते. ही औषधे नॅशनल लिस्ट ऑफ इसेन्शिअल मेडिसिन या यादीत समाविष्ट केलेली असतात. असे एनएनपीएने म्हटले आहे.
कोणती औषधे महाग?
अ‍ॅन्टीबायोटिक्स:
अजिथ्रोमायसिन (२५० मिलीग्राम) – प्रति टॅब्लेट ११.८७ रुपये
अजिथ्रोमायसिन (५०० मिलीग्राम) – प्रति टॅब्लेट २३.९८ रुपये
अमोक्सिसिलिन व क्लेव्हुलेनिक अ‍ॅसिड ड्राय सिरप – प्रति मिली २.०९ रुपये
अ‍ॅन्टीव्हायरल औषधे:एसायक्लोव्हिर (२०० मिलीग्राम) – प्रति टॅब्लेट ७.७४ रुपये
एसायक्लोव्हिर (४०० मिलीग्राम) – प्रति टॅब्लेट १३.९० रुपये
मलेरियावरील औषधे:
हायड्रॉक्सीक्लोरोक्वीन (२०० मिलीग्राम) – प्रति टॅब्लेट ६.४७ रुपये
हायड्रॉक्सीक्लोरोक्वीन (४०० मिलीग्राम) – प्रति टॅब्लेट १४.०४ रुपये
वेदना कमी करणारी औषधे (Pain Killers): डायक्लोफेनाक – प्रति टॅब्लेट २.०९ रुपये
इबुप्रोफेन (२०० मिलीग्राम) – प्रति टॅब्लेट ०.७२ रुपये
इबुप्रोफेन (४०० मिलीग्राम) – प्रति टॅब्लेट १.२२ रुपये
