खिर्डी येथे पाण्याच्या टाकी जवळ घाणीचे साम्राज्य ; नागरिकांचे आरोग्य धोक्यात
खिर्डी ता.रावेर,मंडे टू मंडे न्युज प्रतिनिधी। रावेर तालुक्यातील खिर्डी खु येथील बलवाडी रस्त्यावरील पाण्याच्या टाकी जवळ मोठ्या प्रमाणात घाण कचरा पडलेला आहे.तसेच गटार अभावी सांडपाण्याचा योग्य तो निचरा होत नसल्यामुळे सांडपाणी रस्त्यावर जमा होत असल्याने दुर्गंधीयुक्त पाण्यातून नागरिकांना येजा करावी लागत आहे. यामुळे परिसरातील नागरिकांचे आरोग्य धोक्यात आले आहे.
सन २०१८ मध्ये सिमेंट काँक्रिट चा रस्ता तयार करण्यात आला परंतू गटार बांधकाम न केल्याने नियोजन शून्य कारभाराचा त्रास मात्र नागरिकांना सहन करावा लागतोय. नागरिकांच्या घरातील सांडपाणी वाहून नेण्यासाठी ग्रामपंचायत प्रशासनाने कोणत्याही प्रकारची उपाय योजना राबविली नसल्याने नागरिकांना ऐन भर उन्हाळ्यात आणि पावसाळ्यात ही चिखलातून वाट काढावी लागते या बाबत ग्रामस्थांनी लोकप्रतिनिधी यांना वारंवार सांगितले असूनही कोणत्याही प्रकारची कार्यवाही केली नसल्याचा आरोप ग्रामस्थ करीत आहेत.सांडपाण्याचे योग्य ते नियोजन करून विल्हेवाट लावावी व त्वरित गटारीची स्वच्छता करावी अशी मागणी ग्रामस्थांनी केली आहे.
