धक्कादायक : ४३ जन्म मृत्यू दाखल्यांवर तहसीलदारांच्या बनावट सह्या, बनावट जन्मदाखले तयार करून नागरिकत्व मिळवण्याचं बांगलादेशी कनेक्शन?
जळगाव, मंडे टु मंडे न्युज नेटवर्क | जळगाव शहरातील तब्बल ४३ जन्म-मृत्यू प्रकरणांवर तहसीलदारांच्या बनावट सह्या आढळल्याने मोठी खळबळ उडाली आहे. जळगावातील या प्रकरणातही बनावट जन्मदाखले तयार करून नागरिकत्व मिळवण्याच बांगलादेशी कनेक्शन असल्याचा संशय व्यक्त केला जात आहे.
महापालिकेच्या जन्म-मृत्यू नोंदणी विभागात तब्बल ४३ प्रकरणांवर तहसीलदारांच्या बनावट सह्या आढळल्या आहेत.
या प्रकारामुळे बनावट जन्मदाखले तयार करून नागरिकत्व मिळवण्याच्या मोठ्या रॅकेटचा संशय व्यक्त केला जात असून या संपूर्ण गैरव्यवहाराच्या सखोल चौकशीचे आदेश
जिल्हाधिकारी आयुष प्रसाद यांनी दिले आहेत.
फेब्रुवारी २०२५ या महिन्यात अवघ्या दहा ते बारा दिवसांत जळगाव महापालिकेत ५० प्रकरणे दाखल झाली होती, त्यातील ४९ जन्मदाखले आणि १ मृत्यू दाखला होता. मात्र, तपासणी करत असताना कर्मचाऱ्यांना तहसीलदारांच्या सही बाबत शंका निर्माण झाल्याने या बाबत चौकशी केली असता चौकशीदरम्यान, फक्त ७ दाखल्यांवर खऱ्या सह्या असल्याचे स्पष्ट झाले, तर उर्वरित ४३ दाखल्यांवर बनावट सह्या आढळल्या. या घटनेने अनेक शंका कुशंका निर्माण झाल्या आहेत.
या आधीही मालेगावमध्ये अशाच प्रकारच्या बोगस दाखल्यांमुळे तहसीलदार नायब तहसीलदार यांच्यासह पाच अधिकाऱ्यांवर निलंबनाची कारवाई झाली होती. या सह राज्यात अनेक ठिकाणी रोहिंग्या आणि बांगलादेशी घुसखोरांनी बनावट जन्मदाखल्यांच्या आधारे नागरिकत्व मिळवल्याचे अनेक प्रकार समोर आले असल्याने जळगावातील या प्रकरणातही बांगलादेशी कनेक्शन असल्याचा संशय वर्तवण्यात येत असल्याने या गैरव्यवहाराच्या पार्श्वभूमीवर, जळगाव जिल्हाधिकारी आयुष प्रसाद यांनी या प्रकरणाच्या चौकशीचे आदेश दिले असून जळगाव महापालिकेने संपूर्ण प्रकरणाचा तपास सुरू केला आहे. तसेच, तहसीलदार कार्यालयाकडून अज्ञात व्यक्तीविरुद्ध गुन्हा दाखल करण्याची प्रक्रिया सुरू आहे. त्यामुळे या प्रकरणात दोन स्वतंत्र गुन्हे दाखल होण्याची शक्यता आहे.
