धक्कादायक : डॉक्टरला मारहाण, रुग्णावर व्यवस्थित उपचार होत नसल्याचा आरोप
जळगाव, मंडे टु मंडे न्युज नेटवर्क l रुग्णालयात रुग्णावर व्यवस्थित उपचार होत नसल्याचा आरोप करत एका रुग्णाच्या नातेवाईकाने कर्तव्यावर असलेल्या जळगाव
शहरातील शासकीय वैद्यकीय महाविद्यालय व रुग्णालयातील
कनिष्ठ निवासी डॉक्टरला मारहाण केल्याची धक्कादायक घटना घडली.
मिळालेली माहिती अशी की, जळगाव शहरातील शासकीय वैद्यकीय महाविद्यालय व रुग्णालयात शनिवार रोजी रात्री १०.३० वाजेच्या सुमारास रुग्णालयातील अतिदक्षता विभागात सिध्दार्थ भिमराव जाधव यांच्यावर (एमएलसी पेपर नंबर २२२३) उपचार सुरू आहेत. रुग्णावर व्यवस्थित उपचार होत नसल्याचा आरोप करत सिद्धार्थ जाधव या रुग्णाचा नातेवाईक विक्की केजकर (रा. भुसावळ) याने कर्तव्यावर असलेल्या कनिष्ठ निवासी डॉ. जैद पठाण यांच्याशी वाद घातला. मात्र डॉ. जैद हे त्याला समजावीत असताना त्याने रुग्णसेवेत अडथळा आणून डॉ. जैद पठाण याना चापटाबुक्क्यांनी मारहाण केली.
या प्रकरणी अतिरिक्त वैद्यकीय अधीक्षक डॉ. इमरान नजीम पठाण यांनी जिल्हापेठ पोलीस स्टेशनला फिर्याद दाखल केली असून विक्की केजकर (रा. भुसावळ) याच्यावर जिल्हा पेठ पोलीस स्टेशनला गुन्हा दाखल करण्यात आला असून पोलीस उपनिरीक्षक भारती देशमुख या पुढील तपास करीत आहेत.
