जमिनींच्या खरेदी-विक्रीसाठी “या” कागदपत्राची गरज नाही, शासनाचा मोठा निर्णय!
नाशिक, मंडे टु मंडे न्युज नेटवर्क | शेतजमिनीच्या खरेदी-विक्री प्रक्रियेसंदर्भात एक महत्त्वपूर्ण बदल जाहीर करण्यात आला आहे. जर जमीन दस्तामध्ये मिळकतीची ओळख पटविण्यासाठी पुरेसे वर्णन नमूद केलेले असेल आणि ती जमीन प्रमाणभूत क्षेत्रापेक्षा कमी नसेल, तर अशा दस्तासाठी मोजणी नकाशा (Measurement Map) जोडण्याची गरज नाही, असे स्पष्ट करण्यात आले आहे. हा निर्णय नाशिकचे नोंदणी उपमहानिरीक्षक आणि मुद्रांक उपनियंत्रक राजेंद्र गायकवाड यांनी प्रसिद्धीपत्रकाच्या माध्यमातून जाहीर केला आहे.
दुसरा दस्त नोंदणीसाठी कोणताही नवीन बदल नाही.
या निर्णयामुळे नागरिकांमध्ये निर्माण झालेली संभ्रमावस्था दूर झाली आहे. शेतजमिनीच्या खरेदी-विक्री दस्तामध्ये पूर्वीप्रमाणेच मिळकतीचे ओळख पटविणारे पुरेसे वर्णन नमूद केले असणे आवश्यक आहे. यामध्ये कोणताही बदल करण्यात आलेला नसून, दस्त नोंदणीसाठी लागणाऱ्या कागदपत्रांची यादीही पूर्ववतच ठेवण्यात आली आहे. त्यामुळे मोजणी नकाशा न जोडता देखील, योग्य वर्णनासह जमीन दस्त नोंदणी करता येणार आहे.
मोजणी नकाशा मिळवण्यासाठी लागणारा वेळ, श्रम आणि खर्च आता वाचणार आहे. विशेषतः ग्रामीण भागातील शेतकरी आणि जमीन व्यवहार करणाऱ्या नागरिकांसाठी ही एक मोठी दिलासा देणारी बाब आहे. जमीन खरेदी-विक्री करणाऱ्या नागरिकांना या निर्णयाचा थेट फायदा होणार आहे.
दस्तामध्ये जमिनीची स्पष्ट व सुस्पष्ट ओळख पटविणारे तपशील असणे अत्यावश्यक आहे. वर्णन अपूर्ण किंवा संदिग्ध असल्यास, मोजणी नकाशा जोडणे आवश्यक ठरेल. त्यामुळे नागरिकांनी दस्त तयार करताना जमिनीचा तपशील अचूक आणि स्पष्ट स्वरूपात नमूद करणे गरजेचे आहे. असेही नोंदणी उपमहानिरीक्षक गायकवाड यांनी स्पष्ट केले आहे.
दरम्यान, या नव्या मार्गदर्शक तत्वांमुळे दस्त नोंदणी प्रक्रिया अधिक सुलभ व खर्चिकरहित होणार असून, नागरिकांना वेगाने व्यवहार पूर्ण करता येणार आहेत. मात्र, दस्तामध्ये जमिनीचे योग्य वर्णन असणे हे अत्यंत महत्त्वाचे आहे, याकडे लक्ष देणे आवश्यक आहे. या निर्णयामुळे शेतजमिनीच्या व्यवहारांमध्ये पारदर्शकता आणि सुलभता वाढण्याची शक्यता आहे.
