ट्रकच्या धडकेत दुचाकीस्वाराचा मृत्यू
जळगाव (प्रतिनिधी)। येथे आज सकाळी उमाळे फाट्यानजीक दुचाकीने कंपनीत कामावर जात असतांना ट्रकने दिलेल्या धडकेत एकाचा मृत्यू झाल्याची दुर्दैवी घटना घडली.
याबाबत अधिक असे की, आज सकाळी ८ वाजेच्या सुमारास डिगंबर सोनू नेमाडे (वय-६५, रा. गजानन नगर) हे नेहमीप्रमाणे एमआयडीसीतील भाग्यश्री प्लास्टिक कंपनीत कामाला जात होते. चिंचोली-उमाळे गावादरम्यान राधाकृष्ण लॉनजवळ समोरून येणाऱ्या ट्रकने त्यांच्या दुचाकीला जोरदार धडक दिल्याने ते गंभीर जखमी झाले. त्यांना तातडीने शहरातील खासगी रूग्णालयात दाखल करण्यात आले.
मात्र प्रकृती गंभीर असल्याने नेमाडे यांना गुलाबराव देवकर वैद्यकिय महाविद्यालयात रवाना करण्यात आले. त्याठिकाणी डॉक्टरांनी नेमाडे यांना मयत घोषीत केले. एमआयडीसी पोलीसांनी ट्रक ताब्यात घेतले असून चालकास अटक करण्यात आली आहे.याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली.
