अंगणवाडी सेविकांना निवृत्तीवेतन, सेवानिवृत्ती उपदान व लाडकी बहिण योजनेचा प्रोत्साहन भत्ता द्यावा- आ. खडसे यांची विधानपरिषदेत मागणी
नागपूर,मंडे टु मंडे न्युज नेटवर्क | विधानमंडळाचे हिवाळी अधिवेशन सुरू झाले असून विधानपरिषद सभागृहात आ एकनाथराव खडसे यांनी राज्यातील अंगणवाडी सेविकांना निवृत्तीवेतन, सेवानिवृत्ती उपदान व मुख्यमंत्री माझी लाडकी बहिण योजनेचा प्रोत्साहन भत्ता वितरीत करण्या बाबत प्रश्न उपस्थित केला यावेळी ते म्हणाले
राज्यातील अंगणवाडी सेविकांना निवृत्तीवेतन, सेवानिवृत्ती उपदान व लाडकी बहिण योजनेचा प्रोत्साहन भत्ता वितरीत करण्याबाबतचा प्रस्ताव वित्त विभागाला पाठविण्यात आला आहे मात्र या प्रस्तावाबाबत अद्यापही वित्त विभागाने कोणताही निर्णय घेतला नसल्याने सदरहू प्रस्ताव प्रलंबित असल्यामुळे सध्या कार्यरत असलेल्या व सेवानिवृत्त होणाऱ्या अंगणवाडी कर्मचाऱ्यांवर उपासमारीची वेळ आली असल्याचे माहे ऑक्टोबर, २०२५ मध्ये वा त्या सुमारास निदर्शनास आले आहे,
राज्यासह जळगाव जिल्ह्यातील अंगणवाडी सेविकांनीही सेवानिवृत्ती उपदान, निवृत्तीवेतन व इतर मागण्यासंदर्भात दिनांक २६ ऑगस्ट, २०२५ रोजी वा त्यासुमारास जिल्हा परिषदेवर धडक मोर्चा आंदोलन केले
राज्यासह जळगाव जिल्ह्यातील अंगणवाडी सेविकांना निवृत्तीवेतन, सेवानिवृत्ती उपदान व लाडकी बहिण योजनेचा प्रोत्साहन भत्ता वितरीत करण्याबाबतच्या प्रस्तावास तातडीने मान्यता देण्यात यावी व याबाबत शासनाने कोणती कार्यवाही केली वा करण्यात येत आहे याची माहिती द्यावी अशी मागणी आ एकनाथराव खडसे यांनी केली
त्यावर महिला व बालविकास मंत्री आदिती तटकरे यांनी उत्तर देताना सांगितले एकात्मिक बालविकास सेवा योजनेमधील अंगणवाडी सेविका व मदतनीस यांना सेवानिवृत्तीनंतर एक रकमी लाभाच्या योजनेंतर्गत लाभ देण्यात येतो.
जळगाव जिल्ह्यासह राज्यातील अंगणवाडी सेविका व मदतनीस यांनी पेन्शन, सेवानिवृत्ती उपदान मिळणेबाबत मागणी केलेली आहे. राज्यातील अंगणवाडी सेविका व मदतनीस यांच्या पेन्शन व सेवानिवृत्ती उपदान प्रस्तावाबाबत शासन स्तरावर विचारविनिमय सुरू आहे. तसेच अंगणवाडी सेविकांना लाडकी बहिण योजनेंतर्गत अनुज्ञेय प्रोत्साहन भत्ता देण्यात आला असल्याचे आदिती तटकरे यांनी सांगितले
