नशिराबाद मध्ये पोलिस कर्मचाऱ्याच्या घरावर सशस्त्र दरोडा ; रिव्हॉल्वर अन् सुरा दाखवून लुटीचा प्रयत्न
नशिराबादमध्ये पोलिस नाईकाच्या घरात घुसून लुटीचा प्रयत्न; कार घेऊन चोरटे फरार
नशिराबाद.मंडे टु मंडे न्युज. डॉ.दीपक लोखंडे || नशिराबाद शहरातील मुक्तेश्वर नगर परिसरातील भादली रोडवर बुधवारी रात्री साडेआठच्या सुमारास दोन तोंडाला मास्क लावलेल्या तरुणांनी पोलिस नाईक गणेश कोळी यांच्या घरात घुसून कुटुंबीयांना सुरीचा धाक दाखवत दागिने व रोख रक्कम देण्याची मागणी केली. मात्र, घरातील सदस्यांनी आरडाओरड केल्याने चोरट्यांनी गणेश कोळी यांच्या हातातील कारची चावी घेऊन त्यांच्या कारमधून भादली रोडच्या दिशेने पलायन केले.
गणेश कोळी यांच्या पत्नी सुनीता कोळी यांच्यासह घरातील इतर महिला घरात असताना दोघे तरुण अचानक घरात घुसले. त्यापैकी एका चोरट्याने सुनीता कोळी यांच्या गळ्याला सुरी लावून दागिने व रोख रक्कम देण्याची धमकी दिली. यावेळी गणेश कोळी यांनी मदतीसाठी आवाज दिल्याने घरातील वातावरण अधिक गंभीर झाले.
दरम्यान, गणेश कोळी यांनी अंगावरील सोन्याचे दागिने तसेच हातातील सोन्याची अंगठी बाथरूममध्ये लपविल्याची माहिती आहे. घरातील सदस्यांनी आरडाओरड केल्यानंतर चोरट्यांनी गणेश कोळी यांच्या हातातून कारची चावी घेतली आणि कारमधून भादली रोडच्या दिशेने पलायन केले.
घटनेची माहिती मिळताच नशिराबाद पोलिस तसेच एमआयडीसी जळगाव पोलिसांनी संयुक्तपणे शोधमोहीम सुरू केली. पोलिसांनी कारचा शोध घेऊन ती ताब्यात घेतली; मात्र कारमधून पसार झालेले दोन्ही संशयित अद्याप पोलिसांच्या हाती लागलेले नाहीत.
घटनेनंतर परिसरातील नागरिकांमध्ये भीतीचे वातावरण निर्माण झाले आहे. आरोपींचा शोध घेण्याचे काम सुरू असून, ते लवकरच जेरबंद होतील, असे नशिराबादच्या सहाय्यक पोलिस निरीक्षक योगिता नारखेडे यांनी सांगितले.
शोधमोहीम राबवून कार ताब्यात घेतल्याबद्दल गणेश कोळी यांनी नशिराबाद पोलिस आणि एमआयडीसी जळगाव पोलिसांचे आभार मानले. दरम्यान, या घटनेबाबत नशिराबाद पोलिस ठाण्यात अद्याप लेखी तक्रार दाखल झालेली नसल्याची माहिती मिळाली.
बातम्यांच्या अपडेट मिळवण्यासाठी आम्हाला फॉलो करा
