शोध स्वकर्तृत्वाचा, वेध भविष्याचा ! तरुणांनी जिद्द, मेहनत आणि आत्मविश्वासाच्या बळावर स्वतःचे भविष्य घडवावे – व्याख्याते गणेशजी शिंदे
सावदा.ता.रावेर.मंडे टु मंडे न्युज || तरुणांनी केवळ नोकरीच्या संधींच्या प्रतीक्षेत न राहता स्वतःमधील कौशल्ये ओळखून उद्योजकतेच्या माध्यमातून स्वावलंबनाचा मार्ग स्वीकारावा. जिद्द, मेहनत आणि आत्मविश्वासाच्या बळावर स्वतःचे भविष्य घडवावे, असे प्रेरणादायी आवाहन प्रसिद्ध व्याख्याते गणेशजी शिंदे यांनी केले. सोशल मीडियाच्या आभासी जगात गुंतून न राहता प्रत्यक्ष जीवनात आपल्या कर्तृत्वाचा ठसा उमटवावा, असा संदेशही त्यांनी तरुणांना दिला.
सावदा पोलीस स्टेशनच्या वतीने गुरुवार, १५ ऑक्टोबर रोजी सकाळी ९.३० वाजता कुलसुमबाई अख्तर हुसेन मंगल कार्यालयात ‘शोध स्वकर्तृत्वाचा, वेध भविष्याचा’ या विषयावर व्याख्यानाचे आयोजन करण्यात आले होते. ‘तरुणांच्या उज्ज्वल भविष्यासाठी एक पाऊल’ या संकल्पनेतून आयोजित या कार्यक्रमात गणेशजी शिंदे यांनी विद्यार्थ्यांशी संवाद साधत करिअर, उद्योजकता, आधुनिक तंत्रज्ञान आणि जीवनातील आव्हानांना सामोरे जाण्याबाबत मार्गदर्शन केले.
यावेळी मुक्ताईनगरचे उपविभागीय पोलीस अधिकारी नंदराज पाटील, सहाय्यक पोलीस निरीक्षक गणेश फड, माजी नगराध्यक्ष राजेंद्र चौधरी, उपनगराध्यक्ष फिरोज खान पठाण यांच्यासह विविध शाळांचे शिक्षक, प्राचार्य, विद्यार्थी आणि मान्यवर उपस्थित होते.
छोट्या व्यवसायातूनही मोठे यश शक्य!
उद्योजकतेच्या संधी स्पष्ट करताना शिंदे यांनी सोलापूर येथील महिला बचत गटाने ज्वारीच्या भाकरीच्या व्यवसायातून साधलेल्या आर्थिक प्रगतीचे उदाहरण दिले. तसेच सामान्य मातीचाही सौंदर्यप्रसाधनांसाठी उपयोग करून तिचे मूल्य वाढविता येते, हे सांगत कल्पकतेचे महत्त्व अधोरेखित केले.
यशस्वी व्यवसाय उभारण्यासाठी मोठे भांडवलच आवश्यक असते असे नाही. योग्य नियोजन, कौशल्य, मेहनत आणि नवनवीन कल्पनांच्या जोरावर ग्रामीण भागातील तरुणांनाही स्वतःचा व्यवसाय उभा करता येतो. त्यामुळे उपलब्ध संधींचा अभ्यास करून स्वतःच्या क्षमतेवर विश्वास ठेवण्याचे आवाहन त्यांनी केले.
सोशल मीडियावरील लाईक्सपेक्षा प्रत्यक्ष कर्तृत्व महत्त्वाचे!
तंत्रज्ञानातील वेगवान बदलांचा संदर्भ देत त्यांनी तरुणांनी काळानुसार स्वतःला अद्ययावत ठेवण्याची गरज व्यक्त केली. आजची स्पर्धा केवळ स्थानिक पातळीवर मर्यादित नसून राष्ट्रीय आणि जागतिक स्तरावर पोहोचली आहे. त्यामुळे आधुनिक कौशल्ये आत्मसात करणे आणि नव्या संधींचा शोध घेणे आवश्यक आहे.
सोशल मीडियावरील लाईक्स, प्रसिद्धी आणि दिखाव्यापेक्षा प्रत्यक्ष आयुष्यात मिळविलेले यश अधिक महत्त्वाचे आहे. आभासी जगात वेळ घालविण्याऐवजी स्वतःच्या व्यक्तिमत्त्व विकासावर, ज्ञानावर आणि ध्येयपूर्तीवर लक्ष केंद्रित करावे, असे त्यांनी सांगितले.
सायबर गुन्ह्यांबाबत सतर्क राहण्याचे आवाहन
डिजिटल माध्यमांच्या वाढत्या वापरासोबत सायबर गुन्ह्यांचे धोकेही वाढत असल्याचे सांगत शिंदे यांनी विद्यार्थ्यांना सावध राहण्याचा सल्ला दिला. बनावट सोशल मीडिया प्रोफाइल, अनोळखी व्यक्तींचे व्हिडिओ कॉल, आर्थिक आमिषे आणि ब्लॅकमेलिंग यांसारख्या प्रकारांपासून दूर राहण्याचे आवाहन त्यांनी केले.
वैयक्तिक माहिती, संवेदनशील छायाचित्रे किंवा व्हिडिओ अनोळखी व्यक्तींशी शेअर करू नयेत. सायबर गुन्ह्याला बळी पडल्यास घाबरून न जाता पालकांशी संवाद साधावा आणि पोलिसांची मदत घ्यावी, असे त्यांनी स्पष्ट केले.
विशेषतः अल्पवयीन मुला-मुलींनी एखादी चूक झाल्यास ती भीतीपोटी लपवू नये. विश्वासातील व्यक्तीशी मोकळेपणाने बोलून योग्य वेळी मदत घ्यावी, असे सांगत त्यांनी विद्यार्थ्यांमध्ये जागरूकता निर्माण करण्यावर भर दिला.
अपयश म्हणजे शेवट नव्हे; आत्मविश्वासाने पुढे चला!
छत्रपती शिवाजी महाराज, छत्रपती संभाजी महाराज आणि पुण्यश्लोक अहिल्यादेवी होळकर यांच्या संघर्षमय जीवनाचा संदर्भ देत शिंदे यांनी धैर्य, स्वाभिमान आणि कर्तव्यनिष्ठेचे महत्त्व विशद केले. अमिताभ बच्चन यांच्या कारकिर्दीचे उदाहरण देत अपयश किंवा नकारामुळे खचून न जाता आपल्या गुणांना योग्य दिशा देऊन सातत्याने प्रयत्न करण्याचा सल्ला त्यांनी दिला.
आई-वडिलांच्या कष्टांची जाणीव ठेवून स्वतःची ध्येये निश्चित करा, स्वतःच्या क्षमतेवर विश्वास ठेवा आणि समाजासाठी उपयुक्त ठरेल असे जीवन घडवा, असे आवाहनही त्यांनी केले. विवाहासारखे महत्त्वाचे निर्णय घेताना परस्पर आदर, सुरक्षितता आणि भविष्यातील परिणामांचा विचार करणे आवश्यक असल्याचे त्यांनी नमूद केले.
गुन्हेगारी प्रतिबंधासाठी सावदा पोलिसांचा पुढाकार
गुन्हा घडल्यानंतर कारवाई करण्यासोबतच गुन्हे घडू नयेत, यासाठी तरुणांशी थेट संवाद साधून त्यांच्यात जागरूकता निर्माण करण्याचा सावदा पोलिसांचा प्रयत्न या कार्यक्रमातून दिसून आला. विद्यार्थ्यांना करिअरविषयक दिशा देतानाच सायबर सुरक्षेबाबत सजग करणे आणि सकारात्मक दृष्टिकोन विकसित करण्यावर या व्याख्यानात भर देण्यात आला.
कार्यक्रमाचे सूत्रसंचालन वैशाली मॅडम यांनी केले, तर सहाय्यक पोलीस निरीक्षक गणेश फड यांनी उपस्थितांचे आभार मानले.
बातम्यांच्या अपडेट मिळवण्यासाठी आम्हाला फॉलो करा
