ग्रामपंचायत निवडणूक ; ‘जो पाजील माझ्या नवऱ्याला दारू, त्या उमेदवाराला नक्कीच पाडू’
मंडे टू मंडे वृत्तसंकलन। (गडचिरोली वृत्तसेवा)
ग्रामपंचायत निवडणुकीच्या प्रचाराला वेग आला आहे. गावपातळीवरील निवडणूक असल्याने सर्वत्र दारूवाटप केले जात असल्याचे एरवीचे चित्र असते. यातूनच पुढे महिलांना त्रास सहन करावा लागतो. अहेरी तालुक्यातील तालवाडा, मिरकल, आलदांडी, सिकंलगट्ट येथील बचत गटाच्या महिलांनी ‘दारूमुक्त निवडणुकी’साठी पुढाकार घेतला आहे. या महिलांनी ठराव पत्रावर स्वाक्षऱ्या करीत ‘जो पाजील माझ्या नवऱ्याला दारू, त्या उमेदवाराला नक्कीच पाडू’ असा संकल्प केला आहे. त्यामुळे हादरलेल्या उमेदवारांनीही निवडणूक काळात दारूचे वाटप करणार नसल्याचे संकल्प पत्रावर लिहून देण्यास सुरुवात केली आहे.
याच अनुषंगाने तलवाडा येथे महिला बचत गटाची ग्रामसंघ बैठक आयोजित करण्यात आली होती. बैठकीत तलवाडा, मिरकल, आलदांडी, सिकंलगट्ट या गावांतील महिलांनी एकत्रित येत ‘दारूमुक्त निवडणुकी’चा ठराव घेतला. लोकसभा व विधानसभा निवडणुकीप्रमाणेच ग्रामपंचायत निवडणूकसुद्धा दारूमुक्त करण्यासाठी या महिलांनी पुढाकार घेतला आहे. गावाच्या विकासासाठी दारूमुक्त निवडणूक आवश्यक आहे. निवडणूक काळात दारूचे वाटप झाल्यास दारूविक्री बंद असलेल्या गावातसुद्धा दारू सुरू होण्याची शक्यता आहे. दारूचे आमिष दाखवून निवडून येणारा उमेदवार गाव विकासात अडचण निर्माण करू शकतो. त्यामुळे दारूचे वाटप न करणारा, निर्व्यसनी उमेदवारालाच आमचे मत, असा निर्णय महिलांनी घेतला आहे. दरम्यान दोन उमेदवारांनी वचननामा भरून देत दारूचे वाटप न करण्याचा निर्धार केला आहे.
सिरोंचा पोलिस स्टेशन अंतर्गत येणाऱ्या पोलिस पाटील यांची बैठक ठाणेदार अजय अहिरकर यांच्या अध्यक्षतेखाली झाली. या बैठकीत दारूमुक्त निवडणुकीसंदर्भात चर्चा करण्यात आली. यावेळी दारूमुक्त निवडणुकीसाठी प्रयत्न करणार असल्याचे १८ गावच्या पोलीस पाटलांनी सांगितले.
