पेट्रोलिंग करणाऱ्या पोलीस कर्मचाऱ्यांना धडक देऊन बुलेटस्वार फरार !
मंडे टू मंडे वृत्तसंकलन।
नाशिक (निशाद साळवे): पेट्रोलिंग करणाऱ्या पोलीस कर्मचाऱ्यांच्या बाईकलाच धडक देत जखमी करून एक जण फरार झाल्याची घटना पाहते १ वाजेच्या सुमारास घडली.
पहाटे एक वाजेच्या सुमारास रासबिहारी लिंक रोडने औदुंबर लॉन्सच्या दिशेने पोलीस कॉन्स्टेबल कोतवाल आणि पोलीस शिपाई गंदलवाड हे पेट्रोलिंग करत असताना एक लाल रंगाची बुलेट त्यांना ओव्हरटेक करून भरधाव वेगाने गेल्याने पोलीस कर्मचाऱ्यांना याचा संशय आल्याने त्यांनी बुलेटचा पाठलाग करत झकास हॉटेलजवळ त्यांनी या बुलेटधारकास हाताने थांबण्याचा इशाराही केला. परंतु, बुलेटस्वार न थांबता त्याने भरधाव वेगाने पोलीस कर्मचाऱ्यांच्या बाईकला धडक मारली आणि फरार झाला. यात पोलीस कॉन्स्टेबल कोतवाल हे जखमी झाले आहेत.
पोलिसांनी अधिक तपास केला असता ही बुलेट या इसमाने चोरलेली असल्याचे निष्पन्न झाले. बुलेट चोरीबाबत पंचवटी पोलीस ठाण्यात गुन्हा दाखल झाला होता. याबाबत म्हसरूळ पोलीस ठाण्यात या अज्ञात इसमविरुद्ध गुन्हा दाखल करण्यात आला असून पोलीस फरार झालेल्या संशयित आरोपीच्या मागावर आहेत.
