तरुणाचा धारदार शस्त्राने वार करून खून : महिन्याभरातील दुसरी घटना
मंडे टू मंडे वृत्तसंकलन :
नाशिक, मंडे टू मंडे वृतसेवा : येथील अंबड पोलीस ठाण्याच्या हद्दीतील कारगिल चौक भागात मंगळवारी रात्री जुन्या भांडणाची कुरापत काढून एका तरुणास धारदार शस्त्राने भोसकून खून करण्यात आल्याच्या घटनेने परिसर हादरला असून महिन्या भरातील दुसरी घटना आहे आधी लेखानगर चौपाटीजवळ एका तरुणाचा खून झाला होता.
याबाबत अधिक असे, मंगळवारी ९ वाजेच्या सुमारास राहुल गवळी (वय-२५) या तरुणास अंबड येथील कारगिल चौक परिसरात जुन्या भांडणाची कुरापत काढून संशयितांच्या टोळक्याने बेदम मारहाण करून प्राणघातक हल्ला करत धारदार शस्त्राने वार करत हत्या केली अंबड पोलीस ठाणे हद्दीत महिनाभरात दोन खून झाल्याने नागरिकांमध्ये भीतीचे वातावरण निर्माण झाले आहे. अंबड पोलीस ठाण्याचे सूत्रे जुन्याच अधिकाऱ्यांकडे बदलीनंतर कायम ठेवण्यात आल्याने पोलीस हद्दीतील गुन्हेगारी रोखण्याचे आव्हान उभे ठाकले आहे. सिडकोतील स्टेट बँक चौपाटीजवळ असलेल्या सोनाली मटन खानावळीसमोर गेल्या बुधवारी २८ जुलै रोजी रात्री एका तरुणाचा खून केल्याचा प्रकार ताजा असताना मंगळवारी पुन्हा असाच प्रकार घडला आहे.
याप्रकरणी रात्री उशिरापर्यंत गुन्हा दाखल करण्याचे काम सुरू होते. हल्लेखोर नेमके कोण होते? याबाबत उशिरापर्यंत पोलिसांना सुगावा लागलेला नव्हता. अंबड पोलीस ठाण्याच्या हद्दीत वाढत्या गुन्हेगारीमुळे पोलिसांच्या कारभारावर प्रश्नचिन्ह निर्माण झाले आहे.
