मोठी बातमी : अनिल चौधरी, माजी नगराध्यक्षा गायत्री भंगाळें माजी आमदारांच्या मुलांसह सहकाऱ्यांचा शिवसेना शिंदे गटात प्रवेश; भुसावळच्या राजकारणात नवा ट्विस्ट!
भुसावळ.मंडे टु मंडे न्युज | भुसावळच्या राजकारणात मोठी राजकीय घडामोड घडली आहे. माजी प्रभारी नगराध्यक्ष तथा प्रहार जनशक्ती पक्षाचे उत्तर महाराष्ट्र प्रभारी अनिल चौधरी आणि राष्ट्रवादी काँग्रेस (शरदचंद्र पवार) गटाच्या माजी लोकनियुक्त नगराध्यक्षा गायत्री चैतन भंगाळे यांनी आपल्या समर्थकांसह शिवसेना (शिंदे गट) मध्ये प्रवेश केला आहे. हा प्रवेश मुख्यमंत्री तथा शिवसेना पक्षप्रमुख एकनाथ शिंदे यांच्या उपस्थितीत झाला.
या प्रवेशामुळे भुसावळसह जळगाव जिल्ह्याच्या राजकीय वर्तुळात चर्चेला उधाण आले असून राष्ट्रवादी काँग्रेस (शरदचंद्र पवार) गटासह महाविकास आघाडीला हा मोठा धक्का मानला जात आहे.
विधानपरिषद निवडणुकीपासूनच प्रवेशाचे संकेत
अलीकडे झालेल्या जळगाव विधानपरिषद निवडणुकीत अनिल चौधरी यांनी अपक्ष उमेदवार म्हणून उमेदवारी अर्ज दाखल केला होता. मात्र, मुख्यमंत्री एकनाथ शिंदे आणि प्रहारचे नेते बच्चू कडू यांच्याशी झालेल्या चर्चेनंतर त्यांनी उमेदवारी मागे घेत महायुतीच्या उमेदवाराला पाठिंबा दिला होता. त्याचवेळी चौधरी यांनी लवकरच शिवसेना शिंदे गटात प्रवेश करण्याचे संकेत दिले होते. अखेर बुधवारी रात्री उशिरा त्यांच्या शिवसेनेतील प्रवेशावर शिक्कामोर्तब झाले.
गायत्री भंगाळेंचाही शिवसेनेत प्रवेश
गायत्री चैतन भंगाळे या भुसावळ नगरपालिकेच्या निवडणुकीत राष्ट्रवादी काँग्रेस (शरदचंद्र पवार) गटाकडून लोकनियुक्त नगराध्यक्षा म्हणून निवडून आल्या होत्या. मात्र, त्यांच्या अपात्रतेच्या निर्णयाविरोधातील प्रकरण सध्या उच्च न्यायालयात सुरू आहे. अशा परिस्थितीत भंगाळे यांनीही शिंदे गटात प्रवेश केल्याने भुसावळच्या राजकारणात या घडामोडीला विशेष महत्त्व प्राप्त झाले आहे.
चौधरी कुटुंबातील पुढील पिढीही शिंदे गटात
अनिल चौधरी यांचे पुतणे तसेच माजी आमदार संतोष चौधरी यांचे पुत्र सचिन चौधरी आणि निखील चौधरी यांनीही यावेळी शिवसेना शिंदे गटात प्रवेश केला. त्यामुळे चौधरी समर्थकांचा मोठा गट आता महायुतीतील शिवसेनेसोबत आल्याचे चित्र निर्माण झाले आहे.
भुसावळच्या राजकारणात समीकरणे बदलणार?
भुसावळ शहराच्या राजकारणात मंत्री संजय सावकारे आणि माजी आमदार संतोष चौधरी यांच्यातील राजकीय संघर्ष सर्वश्रुत आहे. या पार्श्वभूमीवर चौधरी समर्थकांचा मोठा गट थेट महायुतीतील शिवसेना शिंदे गटात सहभागी झाल्याने स्थानिक राजकीय समीकरणांवर त्याचा परिणाम होण्याची शक्यता व्यक्त केली जात आहे.
अनिल चौधरी, गायत्री भंगाळे आणि त्यांच्या समर्थकांच्या या प्रवेशामुळे आगामी काळात भुसावळच्या राजकारणात कोणती नवी समीकरणे आकाराला येतात, याकडे राजकीय वर्तुळाचे लक्ष लागले आहे. या घडामोडीचे दूरगामी परिणाम होण्याची शक्यता असून आगामी निवडणुकांच्या पार्श्वभूमीवर हा प्रवेश शिंदे गटासाठी महत्त्वाची राजकीय ताकद ठरू शकतो.
