म्युनिसिपल हायस्कूल भुसावळ येथे सरदार वल्लभभाई पटेल जयंती व इंदिरा गांधी पुण्यतिथी साजरी
भुसावळ.मंडे टु मंडे न्युज. ||भुसावळ नगरपरिषद संचलित म्युनिसिपल हायस्कूल, भुसावळ येथे भारताचे लोहपुरुष, स्वतंत्र भारताचे पहिले उपपंतप्रधान व गृहमंत्री सरदार वल्लभभाई पटेल यांच्या जयंतीनिमित्त तसेच भारताच्या माजी पंतप्रधान स्वर्गीय इंदिरा गांधी यांच्या पुण्यतिथीनिमित्त अभिवादन कार्यक्रम उत्साहपूर्ण वातावरणात संपन्न झाला.
कार्यक्रमाच्या प्रारंभी शाळेचे मुख्याध्यापक श्री. व्ही. पी. सुलताने यांच्या हस्ते सरदार वल्लभभाई पटेल यांच्या प्रतिमेचे पूजन व पुष्पहार अर्पण करण्यात आले. तसेच सेवाज्येष्ठ शिक्षिका श्रीमती शालिनी बनसोडे यांच्या हस्ते स्वर्गीय इंदिरा गांधी यांच्या प्रतिमेचे पूजन करून पुष्पहार अर्पण करण्यात आला.यावेळी उपस्थित सर्व शिक्षक, शिक्षिका, शिक्षकेतर कर्मचारी व विद्यार्थ्यांनी दोन्ही महान नेत्यांना विनम्र अभिवादन केले.
याप्रसंगी डॉ. प्रदीप साखरे, श्री. एस. टी. चौधरी व मुख्याध्यापक श्री. व्ही. पी.सुलताने यांनी विद्यार्थ्यांना मार्गदर्शन केले. आपल्या मार्गदर्शनातून सरदार वल्लभभाई पटेल यांच्या जीवनकार्यावर प्रकाश टाकताना त्यांनी देशाच्या स्वातंत्र्यलढ्यात दिलेले अमूल्य योगदान, स्वातंत्र्यानंतर देशातील संस्थानांचे विलीनीकरण करून राष्ट्रीय एकात्मता व अखंड भारताच्या निर्मितीसाठी केलेले ऐतिहासिक कार्य याविषयी माहिती दिली.
तसेच स्वर्गीय इंदिरा गांधी यांच्या जीवनकार्याचा आढावा घेताना त्यांनी देशाच्या माजी पंतप्रधान म्हणून देशाच्या विकासासाठी घेतलेले निर्णय, राष्ट्राच्या प्रगतीसाठी केलेले कार्य आणि देशाच्या इतिहासातील त्यांचे योगदान याविषयी विद्यार्थ्यांना मार्गदर्शन केले.
आजच्या विद्यार्थ्यांनी केवळ शैक्षणिक ज्ञान न घेता देशाचा जबाबदार नागरिक म्हणून आपली कर्तव्ये ओळखली पाहिजेत. देशाची एकता, अखंडता, बंधुता आणि सामाजिक सलोखा जपणे ही प्रत्येक नागरिकाची जबाबदारी आहे. विद्यार्थ्यांनी राष्ट्रहिताला प्राधान्य देऊन देशाच्या प्रगतीमध्ये आपले योगदान द्यावे, असे आवाहन यावेळी करण्यात आले.
या कार्यक्रमाचे विशेष आकर्षण म्हणजे उपस्थित सर्व विद्यार्थी, शिक्षक व शिक्षकेतर कर्मचाऱ्यांनी राष्ट्रीय एकात्मता व देशाची एकता आणि अखंडता जपण्याची सामूहिक शपथ घेतली. या माध्यमातून विद्यार्थ्यांमध्ये देशप्रेम, राष्ट्रीय एकात्मता, सामाजिक बांधिलकी आणि राष्ट्रसेवेची भावना दृढ करण्याचा संदेश देण्यात आला.
कार्यक्रमाचे प्रभावी सूत्रसंचालन श्री. एन. एच. राठोड यांनी केले. कार्यक्रमासाठी शाळेतील सर्व शिक्षक, शिक्षिका, शिक्षकेतर कर्मचारी यांनी सहकार्य केले. विद्यार्थ्यांच्या उत्स्फूर्त सहभागामुळे कार्यक्रमाला विशेष महत्त्व प्राप्त झाले.
अशा उपक्रमांमुळे विद्यार्थ्यांना देशाच्या महान नेत्यांच्या कार्याची ओळख होऊन त्यांच्यामध्ये राष्ट्रभक्ती, सामाजिक जाणीव आणि राष्ट्रीय एकात्मतेची मूल्ये रुजण्यास निश्चितच मदत होते. राष्ट्रभक्ती व एकात्मतेचा संदेश देत कार्यक्रमाची सांगता झाली.
