पाडळसे येथे बिबट्याला जेरबंद करण्यासाठी बसवला पिंजरा
पाडळसे, ता. यावल. मंडे टु मंडे न्युज प्रतिनिधी | यावल तालुक्यातील पाडळसे गावात गेल्या काही दिवसांपासून बिबट्याच्या वाढत्या वावरामुळे ग्रामस्थांमध्ये भीतीचे वातावरण होते. अखेर, वनविभागाने ग्रामस्थांची मागणी लक्षात घेऊन, बिबट्याला जेरबंद करण्यासाठी पिंजरा बसवला आहे.
गेल्या आठवड्यात पाडळसे -भोरटेक परिसरात वाघाचा धुमाकूळ आणि म्हैस ठार केल्याच्या घटनेनंतर, पाडळसे शिवारातही बिबट्याच्या दर्शनाच्या अनेक घटना समोर आल्या होत्या. यामुळे शेतात कामासाठी जाणाऱ्या शेतकरी आणि मजुरांमध्ये घबराट निर्माण झाली होती. ग्रामस्थांनी वनविभागाकडे बिबट्याचा बंदोबस्त करण्याची वारंवार मागणी केली होती.
वन विभागाने आज, दिनांक १६ जुलै बुधवार रोजी, पाडळसे गावाच्या ज्या परिसरात बिबट्याचा वावर असल्याचे निदर्शनास आले होते, तिथे पिंजरा बसवला आहे. या पिंजऱ्यामुळे बिबट्याला पकडता येईल आणि ग्रामस्थांची भीती कमी होईल, अशी अपेक्षा व्यक्त केली जात आहे.
वनविभागाने ग्रामस्थांना सतर्क राहण्याचे आणि रात्रीच्या वेळी घराबाहेर न पडण्याचे आवाहन केले आहे. तसेच, पिंजऱ्याजवळ कोणीही गर्दी करू नये किंवा त्याला हात लावू नये, अशा सूचनाही देण्यात आल्या आहेत. बिबट्या पिंजऱ्यात जेरबंद झाल्यावर त्याला सुरक्षितपणे नैसर्गिक अधिवासात सोडण्यात येईल.
बातम्यांच्या अपडेट मिळवण्यासाठी आम्हाला फॉलो करा
