१६० कोटींच्या शालार्थ आयडी घोटाळ्याचा तपास वेगात ; एसआयटी कडून २२९ शाळांचे दप्तर ताब्यात, १७९ मुख्याध्यापकांची चौकशी
जळगावसह उत्तर महाराष्ट्रातील चार जिल्ह्यांत तपासाचे जाळे; १२०० संशयितांची नावे समोर, १५० हून अधिक निनावी पत्रे प्राप्त
जळगाव.मंडे टु मंडे न्युज || राज्याच्या शैक्षणिक क्षेत्रात खळबळ उडवणाऱ्या १६० कोटी रुपयांच्या शालार्थ आयडी घोटाळ्याचा तपास विशेष तपास पथकाकडून (एसआयटी) वेगाने सुरू आहे. या प्रकरणात आतापर्यंत २२९ शाळांचे दप्तर तपास पथकाने ताब्यात घेतले असून, १७९ मुख्याध्यापकांची चौकशी करण्यात आली आहे. नाशिक पोलीस आयुक्तांनी नियुक्त केलेल्या दहा एसआयटी पथकांकडून नाशिक, जळगाव, धुळे आणि नंदुरबार या चार जिल्ह्यांत तपास सुरू असून, या प्रकरणात सुमारे १२०० संशयितांची नावे समोर आल्याची माहिती आहे.
जळगाव जिल्ह्यातील सर्वाधिक १०९ शाळांचा समावेश
शालार्थ आयडी घोटाळ्याच्या तपासासाठी एसआयटीची दहा पथके कार्यरत आहेत. दोन स्वतंत्र सहायक पोलीस आयुक्तांकडे तपासाची जबाबदारी सोपवण्यात आली आहे. आतापर्यंत तपासण्यात आलेल्या २२९ शाळांपैकी सर्वाधिक १०९ शाळा जळगाव जिल्ह्यातील आहेत. या शाळांमधील शिक्षक व शिक्षकेतर कर्मचाऱ्यांच्या नियुक्त्या, वैयक्तिक मान्यता, हजेरी मस्टर, आवक-जावक रजिस्टर आणि इतर महत्त्वाच्या कागदपत्रांची तपासणी केली जात आहे.
काही ठिकाणी एसआयटीच्या पथकांनी साध्या वेशात अचानक भेटी देऊन कागदपत्रांची तपासणी केल्याचे समोर आले आहे. चौकशीपासून दूर राहण्यासाठी काही मुख्याध्यापकांनी शाळा सोडल्याचीही माहिती समोर येत आहे. त्यामुळे या प्रकरणातील संशयितांच्या भूमिकेकडे तपास यंत्रणेचे लक्ष लागले आहे.
नियुक्ती आदेशांमध्ये अनियमिततेचा संशय
तपासादरम्यान काही शिक्षक व शिक्षकेतर कर्मचाऱ्यांच्या नियुक्त्यांबाबत गंभीर अनियमितता झाल्याचा संशय व्यक्त करण्यात येत आहे. संबंधित कर्मचाऱ्यांच्या नावाने वैयक्तिक मान्यता किंवा अधिकृत प्रस्ताव उपलब्ध नसतानाही मागील तारखांचे नियुक्ती आदेश दाखवून शालार्थ आयडी तयार करण्यात आल्याचा आरोप आहे. या आयडीच्या आधारे वेतन आणि थकबाकीची रक्कम शासनाकडून मिळवण्यात आल्याचे तपासातून समोर येत असल्याची माहिती आहे.
याशिवाय, बनावट पटसंख्या दाखवून शाळांमधील तुकड्यांना मान्यता मिळवण्यात आल्याचाही संशय आहे. या सर्व प्रकरणांची कागदपत्रांच्या आधारे पडताळणी केली जात असून, संबंधित शिक्षक, शिक्षकेतर कर्मचारी आणि शाळा व्यवस्थापनाची भूमिका तपासली जात आहे.
८४१ शिक्षकांची चौकशी सुरू
नाशिक, जळगाव, धुळे आणि नंदुरबार या चार जिल्ह्यांतील ८४१ शिक्षकांच्या नोंदींची चौकशी सुरू असल्याची माहिती आहे. या तपासातून शालार्थ आयडी तयार करण्याची प्रक्रिया, नियुक्ती आदेशांची सत्यता, वेतन मंजुरी आणि सरकारी अनुदानाच्या वितरणातील संभाव्य अनियमितता तपासली जात आहे. घोटाळ्याची व्याप्ती मोठी असल्याने तपास यंत्रणेकडून प्रत्येक नोंदीची पडताळणी करण्यावर भर दिला जात आहे.
एसआयटीला १५० हून अधिक निनावी पत्रे
या प्रकरणात चारही जिल्ह्यांतून एसआयटी पथकांना १५० हून अधिक निनावी पत्रे प्राप्त झाल्याची माहिती सूत्रांनी दिली आहे. या पत्रांमध्ये काही शाळांमध्ये कथितरीत्या चुकीच्या पद्धतीने सरकारी अनुदान मिळवण्यात आल्याचे तसेच शाळांचे संचालक आणि मुख्याध्यापक यांच्या संभाव्य भूमिकेबाबत आरोप करण्यात आले आहेत.
विशेष म्हणजे, काही पत्रे बनावट नावांचा वापर करून खासगी कुरिअरने पाठवण्यात आल्याचे सांगितले जाते. काही पत्रांमध्ये दिलेले संपर्क क्रमांक बनावट असल्याचा संशय आहे, तर काही क्रमांक आणि माहितीची पडताळणी करणे शक्य असल्याचेही समोर आले आहे. शाळांमधील अंतर्गत वादातूनही काही तक्रारी दाखल झाल्याची शक्यता व्यक्त केली जात आहे. त्यामुळे या पत्रांतील आरोपांची सत्यता स्वतंत्रपणे तपासणे एसआयटीसमोर महत्त्वाचे आव्हान ठरणार आहे.
तपासातून आणखी खुलासे होण्याची शक्यता
शालार्थ आयडी घोटाळ्याची व्याप्ती, संशयितांची संख्या आणि सरकारी तिजोरीला झालेल्या कथित आर्थिक नुकसानीचा विचार करता एसआयटीचा तपास महत्त्वाच्या टप्प्यावर पोहोचला आहे. शाळांचे दप्तर, नियुक्तीविषयक कागदपत्रे, वेतन नोंदी आणि प्राप्त तक्रारींच्या आधारे तपास सुरू असून, आगामी काळात या प्रकरणात आणखी महत्त्वाचे खुलासे होण्याची शक्यता आहे. मात्र, संबंधित व्यक्तींची जबाबदारी आणि आरोपांची सत्यता तपास पूर्ण झाल्यानंतरच स्पष्ट होणार आहे.
बातम्यांच्या अपडेट मिळवण्यासाठी आम्हाला फॉलो करा
