प्रॉपर्टीच्या वादातून २८ वर्षीय तरुणावर गोळीबार ; शहरात खळबळ
जळगाव.मंडे टु मंडे न्युज || शहरातील विवेकानंद नगर परिसरात प्रॉपर्टीच्या जुन्या वादातून एका २८ वर्षीय तरुणावर गोळीबार झाल्याची घटना समोर आली आहे. या हल्ल्यात अर्जुन रोहिदास राठोड हा तरुण जखमी झाला असून, त्याच्या उजव्या कानाखाली गोळी लागली आहे. त्याच्यावर शासकीय वैद्यकीय महाविद्यालय व रुग्णालयात उपचार सुरू आहेत. घटनेमुळे परिसरात खळबळ उडाली असून, पोलिसांकडून हल्लेखोरांचा शोध सुरू आहे.
जुन्या वादातून बाचाबाची
मिळालेल्या माहितीनुसार, अर्जुन राठोड याचा काही व्यक्तींशी प्रॉपर्टीवरून जुना वाद सुरू आहे. या वादासंदर्भात न्यायालयात दावा दाखल असल्याचे अर्जुनने सांगितले. याच पार्श्वभूमीवर जिल्हापेठ पोलीस ठाण्याच्या हद्दीतील एका रुग्णालयाजवळ रात्रीच्या सुमारास त्याची काही जणांशी बाचाबाची झाली.
दुचाकीवरून आलेल्या हल्लेखोरांचा गोळीबार
वाद वाढल्यानंतर दुचाकीवरून आलेल्या हल्लेखोरांनी अर्जुनवर गोळीबार केला. या घटनेत त्याच्या उजव्या कानाखाली गोळी लागल्याने तो जखमी झाला. घटनेनंतर त्याला तातडीने शासकीय वैद्यकीय महाविद्यालय व रुग्णालयात दाखल करण्यात आले. सध्या त्याच्यावर उपचार सुरू आहेत.
हल्ल्यासाठी पैसे दिल्याचा जखमीचा आरोप
या हल्ल्यामागे प्रॉपर्टीचा वाद असल्याचा आरोप जखमी अर्जुनने केला आहे. तसेच, आपल्यावर हल्ला करण्यासाठी दोन व्यक्तींनी हल्लेखोरांना पैसे दिल्याचा दावाही त्याने केला आहे. मात्र, या आरोपांची अधिकृत पुष्टी झालेली नसून, पोलिस तपासातूनच त्यातील तथ्य स्पष्ट होणार आहे.
दरम्यान, घटनेची माहिती मिळताच पोलिसांनी रुग्णालयात जाऊन जखमीची माहिती घेतली. गोळीबार कोणी केला, हल्ल्यामागील नेमके कारण काय आणि या प्रकरणात अन्य कोणाचा सहभाग आहे का, याचा तपास सुरू आहे. अज्ञात हल्लेखोरांचा शोध घेतला जात असून, गुन्हा दाखल करण्याची प्रक्रिया सुरू असल्याची माहिती आहे.
