२५ दिवसांच्या चिमुकल्याचे अपहरण करून विक्री ; चार महिला अटकेत, गुजरातला पाठविण्याचा डाव पोलिसांनी उधळला
मंडे टु मंडे न्युज || २५ दिवसांच्या नवजात बालकाचे अपहरण करून त्याची विक्री केल्याची धक्कादायक घटना
ठाणे जिल्ह्यातील अंबरनाथ येथून समोर आली आहे. या प्रकरणाचा तपास करत पोलिसांनी अवघ्या चार तासांत चार महिलांना अटक केली असून, अपहरण झालेल्या बालकाची सुखरूप सुटका करून त्याला आई-वडिलांच्या स्वाधीन केले आहे. अपहरण केलेल्या बालकाला गुजरातला पाठविण्याची योजना असल्याची माहिती तपासातून समोर आली आहे.
तांत्रिक तपासामुळे प्रकरणाचा छडा
मिळालेल्या माहितीनुसार, अंबरनाथ येथे दोन दिवसांपूर्वी ही घटना घडली. संतोष वाघे यांच्या २५ दिवसांच्या बाळाचे एका महिलेने अपहरण केले. बाळ अचानक गायब झाल्याने आई-वडिलांसह नातेवाईकांनी त्याचा सर्वत्र शोध घेतला. मात्र, बाळाचा ठावठिकाणा लागत नसल्याने अखेर त्यांनी पोलिसांकडे धाव घेत तक्रार दाखल केली.
तक्रारीनंतर पोलिसांनी तातडीने तपास सुरू केला. तांत्रिक माहितीच्या आधारे पोलिसांनी अंबरनाथ आणि उल्हासनगर परिसरात शोधमोहीम राबवली. या तपासादरम्यान अंबरनाथ रेल्वे स्थानकावर एका महिलेकडून अपहरण केलेले बालक ताब्यात घेण्यात आले. पोलिसांनी अवघ्या चार तासांत बालकाचा शोध लावून त्याची सुरक्षित सुटका केली.
बालकाची विक्री झाल्याची माहिती
तपासादरम्यान अपहरण केलेल्या बालकाची एका महिलेला विक्री करण्यात आल्याचे समोर आले आहे. या प्रकरणी पोलिसांनी चार महिलांना अटक केली असून, त्यांच्यामागे बालकांचे अपहरण करून विक्री करणारी संघटित टोळी कार्यरत आहे का, याचा तपास सुरू आहे.
अपहरण केलेल्या बालकाला गुजरातला पाठविण्याची योजना असल्याची माहितीही पोलिस तपासात पुढे आली आहे. त्यामुळे या प्रकरणाचे गुजरातशी असलेले संभाव्य संबंध आणि बालकांच्या तस्करीचे मोठे जाळे कार्यरत आहे का, याचा शोध पोलीस घेत आहेत.
बालकांच्या सुरक्षेचा प्रश्न ऐरणीवर
नवजात बालकाचे अपहरण करून त्याची विक्री करण्याचा प्रकार उघड झाल्याने परिसरात चिंता व्यक्त होत आहे. या प्रकरणातील अन्य संभाव्य आरोपी, बालकांच्या विक्रीमागील कारणे आणि अशा प्रकारच्या इतर घटनांशी या टोळीचा संबंध आहे का, याबाबत पोलिसांकडून पुढील तपास सुरू आहे.
बातम्यांच्या अपडेट मिळवण्यासाठी आम्हाला फॉलो करा
