सहा. पोलीस निरीक्षकासह पोलिस अंमलदार १० हजारांची लाच घेताना ACB च्या जाळ्यात
मंडे टु मंडे न्युज नेटवर्क | तक्रार अर्जावर कोणतीही कायदेशीर कारवाई न करण्यासाठी ५० हजार रुपयांच्या लाचेची मागणी करून, तडजोडीअंती १० हजार रुपये स्वीकारताना एका सहायक पोलिस निरीक्षकाला आणि पोलिस अंमलदाराला लाचलुचपत प्रतिबंधक विभागाने (एसीबी) रंगेहाथ पकडल्याची घटना संभाजी नगर मध्ये घडली. ही कारवाई शुक्रवार दि. ५ जून रोजी संभाजी नगर मधील मुकुंदवाडी पोलिस ठाण्याच्या आवारातच करण्यात आली.या धक्कादायक घटनेमुळे शहर पोलिस दलात कमालीची खळबळ उडाली.
२२ वर्षीय तक्रारदार तरुणाच्या विरोधात मुकुंदवाडी पोलिस ठाण्यात एक तक्रार अर्ज दाखल झाला होता. या अर्जावर कोणतीही कायदेशीर कारवाई न करण्यासाठी आणि गुन्हा दाखल न करण्यासाठी अंमलदार गोकुळ खटावकर याने ५ जून रोजी ५० हजार रुपयांच्या लाचेची मागणी केली होती. मात्र, तक्रारदाराची लाच देण्याची अजिबात इच्छा नसल्याने त्यांनी तत्काळ लाचलुचपत प्रतिबंधक विभागाचे (एसीबी) कार्यालय गाठून या बाबत तक्रार दाखल केली.
तक्रारदाराने दिलेल्या अर्जाच्या अनुषंगाने एसीबीच्या अधिकाऱ्यांनी शुक्रवार दि. ५ जून रोजी पंचांसमक्ष लाचेच्या मागणीची पडताळणी केली. त्यावेळी अंमलदार खटावकर याने ५० हजारांच्या लाचेची मागणी करून तडजोडीअंती १० हजार रुपये स्वीकारण्याचे मान्य केले. तसेच सहायक पोलिस निरीक्षक संजय बहुरे याने या भ्रष्टाचारास प्रोत्साहन दिल्याचेही पडताळणीत निष्पन्न झाले. त्यानंतर ठरल्याप्रमाणे मुकुंदवाडी पोलिस ठाण्याच्या इमारतीतच एसीबीने सापळा रचला. तक्रारदाराकडून १० हजार रुपयांची लाच स्वीकारताना खटावकर आणि बहुरे या दोघांनाही एसीबीच्या पथकाने रंगेहाथ ताब्यात घेतले. याप्रकरणी मुकुंदवाडी पोलिस ठाण्यातच संजय नागुसिंग बहुरे (वय ४८, सहायक पोलिस निरीक्षक, रा. मयूरपार्क) आणि गोकुळ अनिलराव खटावकर (वय ४३, पोलिस अंमलदार, रा. पिसादेवी) या दोघांविरोधात गुन्हा दाखल करण्यात आला.
ही कारवाई एसीबीच्या पोलिस अधीक्षक माधुरी केदार कांगणे, अपर अधीक्षक शशिकांत सिंगारे, उपअधीक्षक बाळासाहेब शिंदे यांच्या मार्गदर्शनाखाली पोलिस निरीक्षक संतोष तिगोटे, वाल्मीक कोरे, हवालदार राजेंद्र सिनकर, राजेंद्र जोशी, प्रकाश डोंगरदिवे आणि सी. एन. बागुल यांच्या पथकाने केली.
