अन्नदात्याच्या संकटात महाराष्ट्राने एकत्र यावे; मुख्यमंत्री सहायता निधीत योगदान देण्याचे रक्षा खडसे यांचे आवाहन
जळगाव.मंडे टु मंडे न्युज || महाराष्ट्रातील अनेक भागांमध्ये निर्माण झालेल्या दुष्काळाच्या गंभीर परिस्थितीच्या पार्श्वभूमीवर केंद्रीय युवा कार्य व क्रीडा राज्यमंत्री रक्षा खडसे यांनी महाराष्ट्रातील नागरिकांना मुख्यमंत्री सहायता निधीत आपल्या क्षमतेनुसार योगदान देण्याचे आवाहन केले आहे.
दुष्काळग्रस्त शेतकरी आणि ग्रामीण कुटुंबांच्या मदतीसाठी नागरिक, उद्योजक, व्यापारी, सामाजिक संस्था आणि सक्षम व्यक्तींनी पुढे येण्याचे आवाहन केंद्रीय मंत्री रक्षा खडसे यांनी केले आहे.
पावसाची कमतरता, पाण्याची टंचाई आणि त्याचा शेतीवर होणारा परिणाम यामुळे शेतकरी आणि ग्रामीण कुटुंबांसमोर मोठे आव्हान निर्माण झाले आहे. या कठीण परिस्थितीत आपल्या अन्नदात्याच्या पाठीशी उभे राहणे ही आपली सामूहिक जबाबदारी असल्याचे रक्षा खडसे यांनी म्हटले आहे.
याच भावनेतून रक्षा खडसे मुख्यमंत्री सहायता निधीत योगदान देत असून, महाराष्ट्रातील नागरिक, उद्योजक, व्यापारी, सामाजिक संस्था, स्वयंसेवी संस्था तसेच सक्षम व्यक्तींनी आपापल्या क्षमतेनुसार मुख्यमंत्री सहायता निधीत योगदान देऊन दुष्काळग्रस्त बांधवांना आधार द्यावा, असे आवाहन त्यांनी केले आहे.
“आपला अन्नदाता संकटात असताना त्याच्या पाठीशी उभे राहणे ही आपली सामूहिक जबाबदारी आहे. याच भावनेतून मी मुख्यमंत्री सहायता निधीत योगदान देत आहे. राज्य सरकारकडून दुष्काळग्रस्त भागांसाठी विविध मदत आणि सवलतींच्या उपाययोजना सुरू आहेत. या शासकीय प्रयत्नांना समाजाच्या सामूहिक सहभागाची जोड मिळणेही तितकेच आवश्यक आहे,” असे रक्षा खडसे यांनी म्हटले.
मुख्यमंत्री देवेंद्र फडणवीस यांच्या नेतृत्वाखाली राज्य सरकारकडून दुष्काळग्रस्त भागांसाठी आवश्यक मदत आणि उपाययोजना करण्यात येत आहेत. शासनाच्या या प्रयत्नांना समाजाच्या सहभागाची जोड मिळाल्यास संकटग्रस्त शेतकरी आणि ग्रामीण कुटुंबांना अधिक आधार मिळू शकतो, असेही त्यांनी नमूद केले.
मदत किती मोठी आहे यापेक्षा, संकटाच्या काळात आपण आपल्या बांधवांच्या पाठीशी उभे राहतो, ही भावना अधिक महत्त्वाची असल्याचे रक्षा खडसे यांनी सांगितले. आपल्या क्षमतेनुसार केलेला छोटासा हातभारही एखाद्या शेतकरी कुटुंबासाठी मोठा आधार ठरू शकतो, असे त्यांनी म्हटले.
“महाराष्ट्रातील नागरिक, उद्योजक, व्यापारी, सामाजिक संस्था, स्वयंसेवी संस्था आणि सक्षम व्यक्तींना माझी मनापासून विनंती आहे की, आपापल्या क्षमतेनुसार मुख्यमंत्री सहायता निधीत योगदान द्यावे. मदतीची रक्कम किती आहे यापेक्षा, या कठीण काळात आपण आपल्या बांधवांच्या पाठीशी उभे राहतो, ही भावना महत्त्वाची आहे,” असे आवाहन केंद्रीय राज्यमंत्री रक्षा खडसे यांनी केले.
दुष्काळाच्या या कठीण काळात समाजातील प्रत्येक घटकाने आपल्या परीने मदतीचा हात पुढे करावा आणि दुष्काळग्रस्त शेतकरी व ग्रामीण कुटुंबांच्या पाठीशी खंबीरपणे उभे राहावे, असेही रक्षा खडसे यांनी आवाहन केले.
बातम्यांच्या अपडेट मिळवण्यासाठी आम्हाला फॉलो करा
